Dawrpui Vengthar

YMA LIBRARY

2011-12-29T23:02:00.000+05:30

Dawrpui Vengthar Branch YMA tan thil thar, kan neih ngai loh kan nei dawn ta e. Middle school (Youth Activities Centre) chungah Library tur sak mek a ni a, hei hi khawtlang tan thil lawmawm tak a ni a. Vengchhung mipuiten kan veng (Kan Branch) hmasawnna leh kan thalaite tangkaipui tur a nih avangin full support kan pek thiam a tul awm e.

2012 Branch YMA OB

2011-12-05T23:08:00.000+05:30

L-R: Zoramthanga, Lallianzuala, KC Lalzamlova, Hmingthangluaia, Rosangzuala

December ni 2 zan khan YMA Indoor Stadium ah 2012 atana Dawrpui Vengthar Branch YMA Office Bearer turte thlan a ni a. Returning Officer Pu Lallungmuana kaihhruaina hnuaiah inthlan programme tluang taka neih a ni.
Vengchhung zaithiam Nl. Catherine VL Chhanhimi, Nl. Zairemkimi leh Nl. Vanlalremruati te'n memberte zaiin an awi a ni.
Hruaitu thlan tharte chu:
President : Pu Zoramthanga (Vala)
Vice President : Pu Lallianzuala
Secretary : Pu KC Lalzamlova
Asst. Secy. : Pu Hmingthangluaia
Treasurer : Dr. Rosangzuala
Fin. Secy. : Pu Lalchhuanmawia

Branch Annual Report 2011

2011-12-05T22:54:00.000+05:30

I. Branch hmalaknate:
1) 2011 chhungin YMA member 2143 an awm.
2) December ni 2, 2011 thlengin mitthi 24 an awm a, ruang chhuak 3 an awm bawk.
3) January atanga December thlatir thlengin veng/khua dang atanga YMA pem lehkha neia rawn pemlut 43 an awm a. Kan veng atanga YMA pem lehkha laa pemchhuak 19 an awm bawk.
4) July ni 1, 2011 khan YMA Indoor Stadium ah Leadership Training neih a ni.
5) Raja Rammohan Roy Library Foundation, Kolkata atanga Library Fund Rs. 6,00,000/- hmuh atangin 1st instalment Rs. 3,00,000/- lak a ni tawh a. Fund hmang hian Govt. Middle School chungah Library Building tur sak mek a ni.
6) YMA Day vawi 76-na chu June ni 15 khan Govt. Middle School kawtah ropui taka hman a ni a. YMA Day denchhen hian Home (CPD) leh chhungkaw 1 hnenah tanpuina sum pek a ni a. Thlanmual leh vengchhung hmun remchangah thing tiak 250 phun a nih bakah, Branch OB ni tawh, mual liam tawhte thlanah YMA flag tar a ni bawk.
7) October 25-27 chhunga YMA Sub-Headquarters, Kolasib-a YMA General Conference vawi 66-na neihah kan Branch atangin mi 7 an kal.
8) November 7-12 chhung khan Aizawl West Jt. YMA Sports neih a ni a, Gold 2 (Basketball & Table Tennis 'W') leh Silver 1 (Badminton 'W') kan la a ni.
9) Kuminah Cultural Committee siam loin Branch in a khaiding a, hnam lam hi vawi 7 entir a ni tawh a ni.
10) Chhiatnia hman tur 'Combo' leh tul dangte leia buaipui mek a ni.
II. Branch sum dinhmun:
1) General-
Income (9 Jan - 30 Nov) = Rs. 2,36,101
Expenditure = Rs. 1,29,788
Bank account-a dah/awm = Rs. 79,271
Balance (Cash in hand) = Rs. 27,042
2) Chhiatni Fund-
Sum hmuh zawng zawng = Rs. 1,45,393
Hmanral zawng zawng = Rs. 1,45,691
Balance (as on 2.12.2011) = Rs. -298
Chhiatni Fund indaihlohna hi Branch sum (General Fund) atanga hman a ni.
III. Committee neih zat = Vawi 26
OB Meeting = 10
Executive = 11
Br. OB & Bial OB = 2
Jt. Meeting = 2
Special Meeting = 1

Vengchhung chanchin tawi

2011-11-15T10:56:00.000+05:30

* Tv. Zobiaksanga S/o Pu Lalrongura, YMA Bial 5-na chu November ni 11 khan Aizawl Civil Hospital ah a tonsil zai a ni a, enkawl mek a ni.
* Pu Remlalfaka S/o Pu Zothansanga (L), YMA Bial 3-na chu pum lam tha lo vangin Presbyterian Hospital ah dahluh a ni a, enkawl mek a ni.
* Kan Branch Sr. Adviser, Pu Vanlalzuiliana chu Central YMA Legal Sub-Committee Secretary atan ruat a ni.

Aizawl West Joint YMA Sports-a kan veng dinhmun

2011-11-15T10:43:00.000+05:30

November ni 7 atanga hman tan, Aizawl West Joint YMA Sports chu November ni 12 khan Jt. YMA Field ah ropui taka khar a ni a. Kan veng dinhmun bik thlurbing ila.
Volleyball:
Mipa team te chu Dinthar Branch YMA team nen an inkhel a, deciding set ah vanduai zawkah kan tang a. Hunthar Branch YMA an hlahthlem zui leh a, round sang zawk an thleng ta lo.
Hmeichhe team a khel tur inhmuhzawh loh avangin an tel ve ta lo.
Inkawibah:
Inkawibah hi kan venga khelh a ni a, Hunthar YMA team laka kan chak hnuin Dinthar YMA team kan hneh ta lo.
Badminton:
Kan veng mipa team te hian Hunthar YMA team an hneh a, semi final erawh an paltlang zo ta lo.
Hmeichhe team pakhat zawk - Nl Vanlalhruaii Sailo leh Nl Ramhlunsangi (Buangpuii) te tangdun chuan Dinthar YMA team an hneh a, semi final ah Zotlang YMA team an hneh ta lo a.
Hmeichhe team dang - Nl Ramengmawii (Nauseni) leh Nl Julie Lalthlanthangi te tangdun chuan Zotlang YMA team leh Dinthar YMA team an hneh a, Zotlang YMA team nen final ah an intum a, an chak lo hlauh.
Table Tennis:
Mipa team te chuan semi final an thleng.
Hmeichhe team te chuan final ah Chawnpui YMA team hnehin an champion a. Hmeichhe team te hi Nl Saithanmawii leh Nl Julie Lalthlanthangi te an ni.
Football:
Pool A ah Dinthar leh Kanan YMA team te nen awmin, round sang zawk an thleng ta lo.
Basketball:
Kanan YMA team, Dinthar YMA team leh Zotlang YMA team hnehin final an lut a. Final ah hian Chawnpui YMA team nen an inkhel a, kan veng YMA team hi 67-53 a chakin an champion.

Dawrpui Vengthar Branch YMA OB-te bihchianna

2011-11-05T23:44:00.000+05:30

Tuna Dawrpui Vengthar Branch YMA hruaitu, Office Bearer-te hi kan branch tana tha an lo thawh tawhte (Hei le, Dawrpui Vengthar-a a lan dan) chu hetiang hi a ni.
Branch-ah
Pu Lallianzuala, President
Kum           Nihna
1985,’87     Exe.Comt. Member
2000-2003 Exe.Comt. Member
2004           Vice President
2005-2011 President
Pu Laldinliana, Vice President
1983-1985    Exe.Comt. Member
1990-1992    Exe.Comt. Member
2004             Exe. Comt. Member
2005-2011    Vice President.
Pu Hmingthangluaia, Secretary
1999-2002    Exe.Comt. Member
2003-2004    Asst. Secretary
2005-2011    Secretary.
Pu Zoramthanga, Asst. Secretary
1988             Exe.Comt. Member
1989-1992    Secretary
1993             Asst. Secretary
1994 Exe.Comt. Member
1995           Secretary
1996          V. President/F. Secretary
1997-2000    Exe.Comt. Member
2001-2002    Asst. Secretary
2003           Vice President
2004-2010    Exe.Comt. Member
2011   Asst. Secretary.
Pu Lalchhuanmawia, Treasurer
1999-2001    Exe.Comt. Member
2002-2011    Treasurer.
Pu KC Lalzamlova, Fin. Secretary
2002-2009    Exe.Comt. Member
2010-2011    Fin. Secretary.
Sub-Committee-ah.
Pu Lallianzuala
2000-2002    President, YMA Chhang
2003-2004    Chairman, Property
2006-2011    Chairman, Kumpuan
Pu Laldinluana
1983         Games and Sports
1991         President, Games and Sports
1996, 2002-2004 Vice Chairman, Music
2006    Chairman, Property
2007-2009     Chairman, Thawhlawm Ip.
Pu Hmingthangluaia
2004    Secretary, Property
2007-2010 Vice Chairman, Kumpuan
Pu Zoramthanga
1987      Cir. Manager, Chanchinbu
1988      Secretary, Games and Sports
1989      Vice Chairman, Games and Sports & Contributing Editor
1994        Secretary, Music &
           Cultural, Secretary, Kumpuan
1997    Chairman, Music
1998    News Editor
1999-2000    Vice Chairman, Music
2001    Chairman, Chanchinbu
2004    Chairman, Music
2007    Vice Chairman, Thawhlawm Ip
2009-20011 Chairman, Thawhlawm Ip
Pu Lalchhuanmawia
1993-’01 Fin. Secretary, YMA Chhang
1994        Treasurer Games and Sports
1994, 1996-1998   Vice Chairman,Property
1999    Vice Chairman Cultural
2004    Treasurer, Property
2008    Chairman, Property
Pu KC Lalzamlova
2006    Secretary, Kumpuan (Supply Reduction)
2010    Vice Chairman, Thlanmual.
2011    Chairman, Chanchinbu
Bialah :

Pu Lallianzuala
1985       incharge, Bial In hmar lam
1987       incharge, Bial In hmar lam
2003 Leader, Bial 6-na.
Pu Laldinliana
1983-1984 Incharge, Pachhunga mual
1985   Incharge CP Road kawngchung
2004    Leader, Bial 4-na
Pu Hmingthangluaia
1997-1998    Asst. Leader, Bial 1-na
1999-2000    Leader, Bial 1-na
2001-2002    Asst. Leader, Bial 1-na
Pu Zoramthanga
1988        Incharge, Dinthar ramri chin
Pu Lalchhuanmawia
1999    Asst. Leader, Bial 2-na
Pu KC Lalzamlova
2002-2003    Asst. Leader, Bial 2-na
2004-2006    Leader, Bial 2-na
Sub-Committee leh Bial hrang hranga OB i/c an nihna tarlan tel a ni lo.

Vengchhung chanchin tawi

2011-11-05T23:37:00.000+05:30

Pu Pasena Sailo, Bial 2-na chu, lung lam that lohna avangin October ni 31 (Thawhtanni) khan New Life, Hospital-ah admit a ni.
Pi Lalmuanpuii w/o Pu Lalchhandama, Bial 1-na chu, Guwahati-ah refer a ni a, hun remchang hmasaah kalpui a ni ang.
Pu Vanlalzuiliana, branch YMA Sr. Adviser leh Nl. C. Lalawmpuii d/o C. Chawngkungate chu, Mizoram State Transport Authority (STA) Board member turin leh Mizofed Board member turin Mizoram sawrkar chuan an ruat thar a.
Pu Lalchhuanmawia, kan branch Treasurer chu apa, Upa Lalchhunga nen Lungpho Kohhran Centenery lawmna hmang turin an zin
Presbyterian kohhhran chuan vawiin hian Khawvel Sunday School Ni an hmang dawn. Tin, Zirtawp zan khan Revival Programme hmangin Dawrpui Vengthar leh Tuikual Pastor bialte chuan Dinthar kawnah mual inkhawm an nei.
Pu Lalthanhlira, Jt. Editor chu zirtawpni khan chhungkaw thilah Bilkhawthlirah a kal a, naktukah hian a lo haw leh ang.

Vengchhung tihfai hnatlang

2011-10-06T12:52:00.000+05:30

Biak in chhak kawng hnawhtu lei an paihfai

6.10.2011 (Ningani) khan 'Faina Hapta' denchhenin Dawrpui Vengthar Local Council chuan nilenga vengchhung tihfai hnatlang an ko a, chhungkaw tin atanga pakhat tal thawhchhuah tur a nih avangin thawkchhuak an thahnem hle.

Vengchhung hmun hrang hrangah hnatlanga thawkchhuakte hi an inthendarh a, YMA Bial 1 & Bial 2 te chu CP Road chin thlanglamah an hnatlang a. YMA Bial 3 & Bial 4 te chu Sairang kawngdungah hnatlangin, YMA Bial 5 & 6 te chu Vaivakawn-Bungkawn Road leh a chhaklamah an hnatlang bawk a ni.

Hnatlangte hian hnim samfai, kawr haifai, leimin paihfai te leh a tul dang dangte an thawk a ni.

Zarkawt pan chhohna kawng sira hnim an samfai

YMA Zaipawl

2011-06-23T00:16:00.000+05:30

2011 YMA Day ah YMA Zaipawl te'n thiam takin mipui an awi a. Hemi ni hian Dawrpui Vengthar a thil la awm ngai lo chu tihpuitlin a ni a, YMA Zaipawl music video changkang em em mai chu mipui en theih turin tlangzarh nghal a ni.

Dawrpui Vengthar thlanmual min

2010-08-10T13:26:00.000+05:30

Ni 5.8.2010 (Ningani) tlai dar 4 khan Dawrpui Vengthar thlanmual chu a min a, thlan engemawzat a chhia a. Khua a tlai deuh tawh avang leh lei chu a la chet reng avangin silpouline a khuhin a tuka senghawi atan dah a ni a.
Zirtawpni zing dar 6 atang khan hnatlang neiin thlan chhia senghawi hna hi an thawk a, tui a la luan reng avangin duh angin a thawh chak theih loh hle a. Nilengin hnatlang hi an nei a, thlan chhinchhiahna kraws 22 leh thlan lung 5 chu an haichhuak a ni.
Thlan chhe zat hi chiang taka hriat theih mai a ni lo a, chhungte thlan chhe tel nia hria te chu YMA hruaitute hnenah an inhriattir zel a, thlan 30-40 vel bawr chu chhe ngeia rin a ni a. Hlamzuih an phumna hmun lam pawh a min tel bawk.

A hmunah hian Minister Pu PC Zoramsangliana bakah R&R Minister Nihar Kanti Chakma leh MLA Pu Thangtea te chuan an tlawh a, tanpuina pawh Rs. 40,000/- chuang a lut tawh a, silpoulin pawh YMA chuan thahnem tak an dawng tawh bawk.

Luikawr lam atangin retaining wall rem tha leh tura ruahman a ni a, Branch YMA chuan anmahni sum atangin a senso hi an tum ang a, tanpuina lut nen tangkawpin lungrem hna hi an kalpui mek a. MP CL Ruala chuan a thuin Rs. 1 lakh a pek tur thu a sawi tawh bawk.

Branch YMA Secy te inneih....

2009-11-17T17:30:00.001+05:30

A hunlai kha chuan mawi ber pawl chu an ni ve tho ania!!!!!!!

Eng dang zawng ai chuan a necktie khi a mawi lehzual...... A kekawr zuih dan lah hi a style viau bawk si... An pahnihin an mawi full tawp!!!!!!!

Thlalak upa

2009-08-05T02:38:00.003+05:30

Hosanna ti zelin aw halleluiah Amen.....

YMA Secretary hmasa ber thlan

2009-08-03T17:11:00.000+05:30

Dawrpui Vengthar Branch YMA Secretary hmasa ber Pu C. Daihvela thlan a ni a, he thla hi 1974 a lak kha a ni a. Pangpar hnunga inchung dum zawk saw tuna Upa Lalchhunga te in awmna hi a ni.
Tunhma leh tunhnua a lan dan chu a in danglam hleih tawh hle a. Hetih lai vel hi chuan in ding hmuh tur pawh a la tam lo a, a khat tawkin a la ding ve pheuh pheuh chauh a ni.

Dinhmun inthlau

2009-08-02T15:58:00.000+05:30

A hma chuan Volleyball Referee a nia, tunah chuan Minister a ni leh daih tawh!!!!!!

Dawrpui Vengthar YMA in thisen pe

2009-08-02T15:48:00.001+05:30

Dawrpui Vengthar Branch YMA leh Aizawl Hospital, Mission Veng tangkawp chuan mi 1.8.2009 (Inrinni) khan Civil Hospital, Aizawl-a damlo thisen mamawh apiangte hman atan a thlawnin thisen unit 44 an pe. Thisen petute hi mipa 40 leh hmeichhia 4, an vaiin mi 44 an ni.

Aizawl Hospital hian thisen petute ei leh in man tih vel te tumsakin, hetianga an tih chhan chu thisen pek tur an mamawh nikhua-in Aizawl Civil Hospital hi an ban ve reng a, hei vang hian Dawrpui Vengthar YMA te thisen pek hi thurualpuiin an tawiawm a.

Aizawl khawpuiah hian Civil Hospital tih lohah chuan Presbyterian Hospital, Durtlang-ah chauh Blood Bank a awm a. Hetih lai hian Private Hospital, Blood Bank nei an awm si loh avangin heng Private Hospital te hian Civil Hospital Blood Bank ami hi ringin thisen pek tur chu an la ve mai thin a ni. Aizawl Hospital-in hetianga tlawmngaia thisen petute tawiawma an puibawm hi Private Hospital dangte tan pawh entawntlak an ti hle.

Most Eligible Bachelor!!

2009-07-24T09:08:00.001+05:30

Dawh fuh viau lo maw?

Parmawi ka thliah che hei

2009-07-23T14:46:00.000+05:30

Indoor Stadium sak hnatlang

2009-07-22T18:30:00.000+05:30

Khawvela YMA Hall hmasa ber chungah Indoor Stadium sak hnatlang an kalpui mup mup a. Rs. nuai 1 chuang lai senga sak a ni a, a hunlai chuan pui tham tak a ni. Khawtlang hruaitute'n chak takin hma an la a, vengchhung mipui an tangrual bawk a, tha taka puitlin theih a nih theih phah ta a ni.

Branch Committee member hmasa ber

2009-07-22T18:13:00.000+05:30

Dawrpui Vengthar Branch YMA din kum 1968 a Branch Committee member te an ni a, an hming hriat kim vek a harsat avangin kan tarlang ta lo mai e.

YMA Day Pualin Free Medical Camp

2009-06-13T19:16:00.000+05:30

Inrinni (13.6.2009) khan YMA Day pualin Dawrpui Vengthar Branch YMA leh Aizawl Hospital & Research Centre tangkawp chuan Dawrpui Vengthar Branch YMA Hall ah a thlawna inentirna, 'Free Medical Camp' an buatsaih a. Inentir an thahnem hle a, chawhnu her tan khan mi 100 chuang an inziaklut tawh a ni.
Dawrpui Vengthar Branch YMA te hian an vengchhungah vehbur khawnin an thil khawn tlingkhawm hian Zauthanga Memorial Tawngtai Bethel Camping Centre, Chawnpui hnenah tanpuina an hlan bawk.
Tanpuina an pek hi Alu bag 2, chi bag 1, purun bag 2, dal bag 2, Nutrela bag 2, Kailash tel 2, Shapers 30 bakah buhfai 4 qtls te a ni.
YMA Day pual hian naktuk zingah vengchhung tihfai hnatlang an nei ang a, zan lamah vengchhung huapin hun hlimawm tak hman an tum bawk.

Kan Veng Map

2009-06-03T15:14:00.001+05:30

A Va Tha Dawn EM!!!

2009-06-01T11:13:00.000+05:30

[He thu hi YMA Chanchinbu, 30.05.09 chhuak ami lakchhuah a ni, chhiar a nawm mai bakah A Tha Dawn Emmm a, post tur a van vang te pawhin a niang chu, kan han post rep mai a nih hi]

Naupang leh thalaite zingah lutuak kan awm ta fur mai. Engvang tak ni ang maw! Kei pawh, kar 2/1 danah lu ka met a, dum a ngai ziah a, kum sawm chuang chu ka dum ve ta. A dumna hlo hi hman nasat lutuk a that loh ka rin bakah a NINAWM ka ti a, tun hnuah phei chuan ka dum lo ta fo mai.

Mahse, NINAWM dang ka tawng leh a, ‘I lu chuh... chuti khati... dum saktu i nei nange?’, tia ka chhungte hial dem ta bawng bawng pawh ka tawng ta fo mai. Alawmawm tho e, induhsakna a ni miau a! Mahse, min duhsakna thu tha pui pui pawh chu kei bawk hian NINAWM ka’n tih leh tlat pek chu!

Heti zawng hian ka ngaihtuah ta a, ‘Mi chuan an duh duh chu sawi se la, ning awm lo taka awm ka’n tum teh ang,’ tih hi. A tha dawn hian ka’n hre khawp a, hei zet chu mithiam nazawng pawhin an theih loh an ti lehnghal! Tichuan, nakina ka lutuak chungchang min sawipui laia ning awm lo taka ka awm hunah pawh, a ruk tak chuan ka ning hle a ni tih tal hi min hriatpui dawn nia.

Hruaia, B-5.

Lawmawm II

2009-05-19T15:30:00.000+05:30

Hei kan ti chho ve bek bek a, blog pangngai te pawh a ang chho ve tan viau na chu, hmasawnna tur scope tam tak a la awm. YMA chanchinbu te kan han dah ve a, bakah hei thlalak bawm te kan han hung thar ve leh ta bawk a, heng bawm ah hian veng chhung YMA lam hawi kher lo pawh thawh khawm liam liam thei ila a duhawm khawp mai.

Tin, kan veng mi, ram pawn lama hnathawk leh lehkha zira awm te tan an beng ber tur a ni tih hria in veng chhung chanchin thar kan hriat ang ang chu thawhkhawm thin ni sela, a va lawmawm dawn em. Chumai bakah kan fate / unau / thian te ram pawn lama awm te pawh he blog lo tlawh ve tur te pawha kan in hrilhhriat hi hma kan sawn zelna tur a ni.

Zir chawp tak meuh meuhva ti kan ni a, lungte mai pawh hetia kan auchhuah tawh chuan, heti lama chinchang hre deuh leh benghawng deuh te phei chu he blog hmasawn zel nan, YMA blog a ni tih hrereng chungin, i in kiltawih lovang u.

A chung kil vei lamah khian Contact us tih a awm a, thurawn pe tur leh chanchin thar thehluh nan te pawh a hman theih e.

2009-05-11T13:53:00.000+05:30

AIZAWL WEST JOINT YMA SPORTS 2009 RESULTS

BADMINTON
Mens Single :
Champion - Lalhlimpuia (Zotlang)
Runner-Up - C. Lalrinthanga
(Zotlang)
Mens Doubles :
Champions - Zabiakthar/Rosangzuala
(Hunthar)
Runner-Up - Vanlalchhuanga/ Lalzemawia (Dinthar)
Above 35 Doubles :
Champions - K. Thangrodinga/ Lalhminmawia (Dinthar)
Runner-Up - Lalhlimpuia/Thara (Zotlang)
Above 45 Doubles (Veteran) :
Champions - Zabiakthara/R. Zonunsanga (Hunthar)
Runner-Up - K. Lalthlamuana/K. Lalthlengliana (Kanan)
VOLLEYBALL
Womens :
Champion - Kanan Branch YMA
Runner-Up - Chawnpui Branch YMA
Mens :
Champion - Hunthar Branch YMA
Runner-Up - Kanan Branch YMA
FOOTBALL
Champion - Kanan Branch YMA
Runner-Up - Chawnpui Branch YMA

Article

2009-05-11T13:52:00.000+05:30

“FAK AN PHU THLAWT E”

- J. Laldawngliana

Rom 12:15-ah chuan, “Lawmte chu lawmpui ula, tapte chu tahpui rawh u” tih inziak kan hmu a, chang 16-naah, “Hnathawk thil tha titu apiangte chu fak an phu a, fak mawlh mawlh rawh u” tih inziak zawm lo mahse, fak an phu thlawt ka tih thenkhatte chu fak an phu a ni lawm ni?
Hman deuh lawk khan VC-te’n an khua leh tuite’n, veng leh khua leh tui tha kan nih theih nan vantlang inkhawm a ko a nih kha, an ti tha hi ka tikhawp a, ka lawm hle mai. Kei pawhin ka ngai pawimawh ve hle mai a, a hun tan hma darkar chanve ngawta hmain Hall ka thleng der tawh a, kan VC-te khan min kohkhawmnaah Rs. 100/- per member-ah min sem lehnghal a, kalte chuan kan tifuh hle a ni lawm ni kha. kei pawhin tifuh ka inti teh a sin aw! Kha min kohkhawm tum khan thusawi benglut thlak tak tak leh mipui vantlang te’n kan zawm ngei ngei atana an thusawi min ngaihthlak tir kha ka lawm hle mai.
Sawrkar lama mithiamte an lo chah a, thil kan hriat atana tul leh pawimawhte min hrilh lehnghal a, a hlawkthlak hle mai. Khatianga kan khawtlang hotute’n veng, khawtlang, chhungkua leh mimal nun a nawm theih nan leh kan lo thianghlim zawk nana hma an la hi an ti tha hle mai. khatiang Public Meeting kha kum 1-ah vawi 2 tal emaw ko thin se, tha hlein ka ring.
Hman deuh khan Gas harsatna avangin chhungtin kan buai a, keini chhung phei chuan Gas bur 1 Rs. 800/- in vawi 4 vel kan lei hman, chu pawh Black bakah chhuhsak luih System-in, tunah chuan hei kan hmuh leh hriat angin kawtkai maiah a man tlawm hman sen lohin Gas kan hnianghnar ta. A van lawmawmin, in va han ti tha tak em, “Aw Dawrpui Vengthar VC-te u, hmatiang sawnin kal zel nang che.” “FAK AN PHU THLAWT E”

Khawtlang Nun Siamthat

2009-05-11T13:50:00.000+05:30

Khawtlang nun siamthat nan mahni phu tawka inchei

Mizo tlangvalte’n nu leh pate thawhchhuah hmangin Bike an lei a, nula ten an mahni thawhchhuah hmangin Scootie an lei thung, tih hi dik maw, dik lo maw. Lo dik ta sela, tu zawk nge mahni thawhchhuah phu tawka inchei thin ni ta ang. Zirlai tam tak, Mobile Handset changkang tak tak nei thinte hi mahni thawhchhuah phu tawk a incheiah kan ngai em? Mahni thawhchhuah phu lova rualawhna hian awhna sual leh thil ruk pawisak lohna hial a thlen fo thin. Rukru, misual an tam viau chuan kan khawtlang chu a thlamuang lova, a thianghlim lo hle tihna a ni.
Kan khawtlang nun siamthat nan mahni phu tawk a inchei, chan tawk a lungawi kan inzirtir uar a tul hle. Sawrkar hnathawk, LDC i nih chuan, i khawi lo kalna apiangah Texi ban ve nghal zel suh, i thawhchhuahin a phu lo. Mahni chan tawk a lungawi thei hi mi vannei leh mi nihlawh ber berte an ni a, mi awhawm ber berte an ni.
Kan khawtlang nun thianghlim lohna chhan ber pakhat chu chan tawk a lungawi thei lote vang a ni tih hriain, kan khawtlang nun siamthat nan mahni phu tawk a inchei leh chan tawk a lungawi thiam hi a pawimawh em em a ni.

Thunawi

2009-05-11T13:47:00.001+05:30

Ni 29.4.’09 (Nilaini) chhun khan VC chawlhbukah naupang pathumin Correcting fluid an lo hnim lai chu man an ni a, pahnih an tlanbo hman a, Lalchhuanmawia, C. Thangchhuana fapa, Govt. Complex chu man a ni a, YMA Hall-a hruaiin hemi ni tlai vek hian an veng YMA hruaitute’n an rawn lam a ni.
Lalruatzela, Vanlallawma fapa, bial 1-na, Lalrinzuali, kum 26, Zuangtuia awm thin, Lalnunpuii, kum 25, Tlangnuam Vengthar leh Lalawmpuii, kum 23, Durtlang Vengtharte chu Aizawl Police Station atangin kan veng YMA hruaitute kutah an rawn hlan a, an ni pali hi Ni 5.5.’09 (Thawhlehni) khan Zauthanga Camping Centre-ah dahluh nghal an ni.
Ni 7.5.’09 (Ningani) zan khan Tlangthankima, kum 18, Hmunsanga (L), Tuikual veng chu SSA Hostel, Primary School-ah a lut ru a, man a nih hnuin an chhungte hrilhhriat an ni a, a chhungte hian hemi zan vek hian an rawn la lehnghal a ni.
Ni 8.5.’09 (Zirtawpni) khan Tv. Malsawmtluanga, Pu Lalbika (L) fapa, bial 2-na chu Faith Home, Chhingchhipah dahluh a ni.

Editorial

2009-05-11T13:45:00.000+05:30

Natna hri

Tunlai hian chanchinbu hrang hrang atangtein natna hri chikhat, Swine Flu chungchang kan hre chamchi a, chutiangin hman deuh khan Bird Flu a lar em em bawk a, thenkhat lahin hlauh nemin an hlau lova, chiai tak tak pawh an awm tih hriat a ni. Heng avanga mutmu pawh tuah thei lo an awm tawh ngei ang. A hlauhawm bawk a, a huattla la em em a ni.
Hetih rual hian tunalaiah kan thalai, Zu, Drugs leh hmeichhiat mipatna hri, natna hlauhawm tak vei mekte hi engangin nge kan vei ve? Tun thla hnih khat lek chhunga YMA hruaitute’n an hmachhawn tam ber chu heng natna veite hi an ni tlat. A pawi em em a ni. Heng tunlai natna hrileng kan sawi aite hian an hlauhawm zawkin kan ram leh hnam hnuk nghawng pha thil a ni a. Nu leh pate’n tunlai hrileng kan vei a, mut mawh hnar mawha kan neih tlukzet hian heng kan ram sualna hri, chak taka darh mek hi engtinnge kan hmachhawn ang tih hi kan veia kan harh a hun tawh takzet a ni.

Lawrkhawm

2009-05-11T13:38:00.000+05:30

O Pu Lalmalsawma, Pu Zothansanga fapa, bial 3-na chu Accident avangin a lu-ah hliam a tawk a, Presbyterian Hospital, Durtlangah dah luh niin tunah hian nikhua a hriat loh avangin ICU-ah enkawl mek a ni.
O Biakthansanga, Pu Zopianga fapa, bial 1-na chu Ni 7.5.’09 (Ningani) khan Pumna avangin Aizawl Civil Hospital-ah hruai a ni a, damdawite pek a nih hnuin in lamah enkawl tura hawpui lehnghal a ni.
O Pu Lalremthanga (Vala), bial 3-na chu Khawsik avangin Aizawl Hospital-ah dahluh a ni.
O Ni 5.5.’09 (Thawhlehni) khan Tv. Hrangtluanga Sailo, Pu Lalnunngila Sailo fapa, bial 5-na chu Aizawl Civil Hospital-ah a dara thir an phum an phawrh a, in lamah enkawl mek a ni.
O Pu Saia, Pi Buki (L) pasal, bial 5-na chu Khawsik avangin Aizawl Civil Hospital-ah enkawl mek a ni.
O Ni 6.5.’09 (Nilaini) khan Pi Lalbangi, Pu K. Sangtluanga nupui, bial 6-na chu Chhul tha lo avangin Aizawl Civil Hospital-ah dahluh a ni.
O Pu F. Lalchhunga, bial 4-na chu Kal tha lo avangin Greenwood Hospial-ah enkawl mek a ni.
O Tv. Laldingngheta (Kawnga), Pu Lalremthanga fapa, bial 3-na, kan chanchinbu semtu ni bawk chu Mumbai-ah Under 16 Basketball Tournament-ah Mizoram aiawhin a kal a, hetiang kan vengin kan nei hi kan chhuang hle.
O Sairuatkima, Dr. Saihlira fapa leh Lalrintluanga (Ate-a), Pu V. Thanvawra (L) fapate chu SAIL Football Academy-in India ram hmun hrang hrang atanga mi 17 an thlanchhuah zingah an tel. Anni 2 bakah hian Mizoram atangin mi 2 an thlang tel bawk a, Training pek an ni ang.
O John Zorammawia, Pu P.B. Kunga fapa, bial 5-na chuan Ni 8.5.’09 (Zirtawpni) khan Lalmuanpuii, Chhinga Veng chu Dawrpui Vengthar Presbyterian Kohhran Hall-ah, ‘Tiam tlat e’ a tihpui ta.
O Henry Zonunmawia, bial 6-na Comtt. member leh T. Lalrinpuii, bial 6-na Comtt member-te chuan Ni 7.5.’09 (Ningani) khan Nisapui-ah ‘Tiam tlat e’ an ti.
O LPS Pro Fight neih mekah kan veng atangin heng mite hi an tel. Tv. Lalremruata, Pu Kapnghilhlova fapa, bial 6-na, Pu Lalhriatpuia, Pu Lalnunngila Sailo fapa, bial 5-na, Tv. Laldawngliana C/o R.K. Lalchhuana, bial 6-na, Tv. Lalhmangaiha, Lalthlamuana fapa, bial 3-na leh Remruatliana, V.N. Chunga fapa, bial 6-na.
Remruatliana hian 3rd Round a lut a, a ni bak midang zawng hi chu an tla fai vek tawh a ni.
O Ni 7.5.’09 (Ningani) khan Pu Lallianzuala, Branch President chu CEC Programme pawimawh hmangin Sialhawk Branch YMA tlawhin a kal a, Ni 9.5.’09 (Inrinni) khan dam takin a lo thleng leh tawh.

SWINE FLU

2009-05-11T13:36:00.000+05:30

Swine influenza-Vawk hri hi natna thar a nilova, vawk natna, thawkna dawt, (Respiratory System) a thawk a ni. He natna vei vawk 10% aia tlem mahin an thihpui thei. He natna thlentu hi virus natna hrik Orthomyxoviridae family a ni a, bird flu virus nen family inang a ni. Vawk atanga mihring in an kaiin natna hlauhawm tak a thlen lemlo nia hriat thin ni mah se, mihring leh mihring inkaichhawn theih a niin ram hrang hrang sawrkar pawhin thapui thawhin invenna hna an thawk mek a ni. Tun dinhmunah ram 19 laiah Swine Flu hi hmuh a ni tawh a, ram engemawzatah rinhlelh test an nei mek bawk. Kum 1918 a Spanish flu leng avanga mi maktaduaih tam tak an thih phahna flu virus H1N1 leh Swine flu virus te hi sub-type inang, mahse strain hrang an ni.
A Natna Thlen Dan :
He natna hrik hi ze nghetlo tak a ni a, vawkin virus hrang hrang mihring influenza virus + ar influenza virus + vawk influenza virus te an hipluhin heng virus te hi an inchawhpawlh a, an insiam danglam thin a, chuta tanga virus thar lo insiam chu vawk atanga mihringah kaiin, mihring leh mihringin awlsam takin an inkaichhawng thei a ni. Tuna natna leng mek hi H1N1 strain, abikin vawk leh mihringa cham reng, inchawhpawlh atanga lo chhuak nia hriat a ni.
Kaichhawn Dan :
He natna hrik hi boruak atangin awlsam taka hipluh a kai theih a ni a, vawk enkawltu ten an kai awlsam bik a ni. Mihringin a kai tawh chuan khuh, hahchhiau leh thawkchhuah boruak atangin midang a kai theih a ni. Tin, natna hrik awmna thil engpawh khawih hnua ka, hnar leh mitte khawih atangin a kai theih bawk. Amaherawhchu vawksa leh vawksa atanga thilsiam eiin he natna hi a kai theih loh tih hriat tur a ni.
Mihringa Natna Lanchhuah Dan :
Hritlang a intanin khawsik, khuh, hrawk na, taksa sil/na, lu na, chau hluah hluah, kawthalo leh luak a tel thei bawk.
Enkawlna/ Damdawi :
Anti-viral drugs - Tamiflu (Oseltamivir), Relenza (Zanamivir) te hi hman lar ber an ni. A venna vaccine rintlak hman mai tur a la awm rihlo.
Khawvel ram hrang hranga he hri kai tawh zawng zawng chu mi 900 zet an ni tawh a (4.5.2009 thlengin), he hri ven nan hian sum leh pai tamtak sen a ni mek a, kum 1918 a Spanish flu a len tuma mihring maktaduai 50 an thih ang kha lo thleng leh ni ta ang se khawvel economy ah harsatna namen lo a thlen ngei dawn a ni. World Bank chuan US$ vaibelchhe 205 chu Mexico a Swine Flu hrileng avangin a chhanchhuahna tur leh invenna tur atan a pe a ni.
Tun dinhmunah pawh hian khawvel sawrkar hrang hrangte chu Swine Flu avang hian an insengso nasa viau tawh a, he hri an hmuhna ramte chuan tourism atanga an sum hmuh pawh nasa takin an hlauh tawhin an khua leh tuite himna atan sum tamtak an hmang ral tawh a ni.
India ramah he hri vei rinhlelh awm nual tawh mahse an kai ngei a ni tih finfiah an la awm lemlo (4.5.2009 thlengin). Mizoram AH & Vety Deptt. a inralring reng a, mipuite pawh fimkhur ila, chiai phahna tur erawh a la awm lo.

Kaka lo zawk MKA

2009-05-07T15:49:00.000+05:30

He thlalak hi a fuh ve hrim hrim a, a lang ber hi pa ropui ve tak a nih vanga helai hmun hi chang thei a ni.

Veng Pa Thenkhat

2009-05-07T14:22:00.000+05:30

Hei pawh chiangkuan huna paihah vawn bei leh tawp. Picture Gallery hran siam hma.

Dawrpui Vengthar

2009-05-07T11:11:00.000+05:30

YMA Hall lanna ka neih hi a chiang vak lo na chu, test nan kan vawm kai chhin a nge, blog a chiankuan deuh hnu a paih leh ah.

LAWMAWM

2009-05-07T00:58:00.000+05:30

Dawrpui vengthar YMA hminga Blog kan nei tur hi ka lawm em em a, YMA a ka member pui zirna leh eizawnna a vanga hmun hla zawk a awmte tan vengchhung chanchin hriat nan leh inpawhna tha zawk kan neih zel theih nan te,Thlarau lam dinhmun thlenga kan than zel theih nan he blog hian i chungah malsawmna thlen mawlh teh se.

GALLERY

2005-05-19T15:22:00.000+05:30

CONTACT US

2005-05-19T14:59:00.000+05:30

Your Name :
Your Email :
Subject :
Message :
Image (case-sensitive):